سلسله سنه اولى جامعه -ميك اب الجامعه { الصباح } 4

السسلام عليكم ورحمه الله وبركاته 

يسسسعد ايامكم حبيباتي 

كيفكم مع قرب الدوامات < آععععععع ههههههههههههههههاي 

إن شاء الله تكون الايام الجايه حلوه وتكون الجداول حلوه < اهم الجدول لو تسنع تسنع الترم معك  .

و إن شاء الله يكون الدوام خفيف حدنا الساعه 2 ونرججع يااارب  . < وحده مكروفه ترجع من الجامعه فاتحه فمها  .

المهم خلوكم من الجداول الهم و نجي ع الشيء الكويسس الميك اب ههههههههه 

زي ماقلت لكم في البوست الي قبله انو محتاره هل اسوي لك بوست عن الميك اب الي استخدمه انا ولا اتكلم بشكل عام 

فا قلت اتكلم بششكل عام احسسن عشان افيد كل الافكار و الاذواق والشخصيات حلو  .

بسس بحدود يعني ما راح اقول لكم عن ميك اب اوفر مع الجامعه لاا لااا لااا 

يعني ميك اب السهرات والمناسبات ابدا مااا نبغاهـ في الجامعه لان ابدا مو مناسب للمكان 

راح اتكلم عن الشدوهات عن البلاشرات عن الفاونديشن عن الكونسيلر كل هذا راح نستخدمه بسسس كيف !!؟

بالشيء البسيط يعني بششكل طبيعي يخلي وجهك هو وجهك مو وجه وحده ثانيه 

راح تكوني بشكل بسسيط و حلوو ومناسب لك وللمكان الي انتي بتروحي له 

حلوين كذا ان شاء الله !!  . 

طيب

لازم كل وحده تعرف نوع بشرتها لانه من نوع بشرتها راح تعرف اذا هي محتاجه ترطيب قبل الميك اب

او تكتفي ب برايمر فقط !! 

طيب راح أبدأ معكم بخطوات واتكلم بالتفصيل الممل هههههههه معليش الممل عشان يرتاح ضميري بس  .

بسسم الله نبدأ : 

1- الترطيب : رطبي وجهك لانك تكوني غسلتيه بغسول فا راح يجف حطي كريم مرطب الي ترتاتحي له انتي 

واستني لحد ما تتشربه البشره . 

2-واقي الشمس والبرايمر  : بنات لا تستهينوا في واقي الشمس والله راح تتعبي اذا خربت بشرتك مرررره مهم الواقي انا اشوفه 

اهم من الميك اب كله ليه حطيت البرايمر والواقي مع بعض بعض واقيات الشمس تكون مثل الفاونديشن فا كثير 

بنات يكتفوا فيه اذا كنتي تستخدمي هذي الواقيات حطي اول شيء برايمر بعدين حطي الواقي اما اذا كنتي تستخدمي واقي شمس 

عادي فا حطيه وخلي البشره تتشربه وبعدين حطي البرايمر وانتقلي معاي للخطوه 3  . 

** سؤال : ايش هو البرايمر؟؟؟؟؟  هو زي الكريم تحطيه قبل الفاونديشن او البيبي كريم يثبت لك الميك اب مايسيح مع الحر 

و في برايمرات مختلفه في منها تخفي المسامات والخطوط الرفيعه هنا ع حسب نوع البرايمر الي معك فا انا بالنسبه لي 

اشوف البرايمر شششيء اساسي عشان مايخرب عليك الميك اب .

**سؤال ايش افضل برايمر ؟؟؟؟؟؟ هذا السؤال ممكن كثير ممكن جواب عليه بس صراحه احس للحين مافي جواب

لان ممكن الي يناسبك مايناسبني وهكذا فا عشان كذا انتي جربي بنفسك لكن بقول لكم تجربتي اذا تبغون تأخذون فكره :

1#برايمر ميك اب فورايفر مرره زمان كنت استخدمه اسمه All mat قوامه مثل الجل شفاف هذا صورته 

كنت مقتنعه فيه بس مو راضيه فيه تمام الرضى كان يثبت البي بي كريم او الفاونديشن 

بسس ما حسيته بيرفكت ما يخفي المسام والخطوط الرفيعه ابدا يعني اعطيه 7/10  .

..

2# برايمر من بينفت اسمه porefessional هذا من نايحه المسام مررررره جميل كثير بلوقرز تكلموا عنه 

يثبت لك الميك اب تثبيته جميل وحاليا انا استخدمه وماشيه معاه تمام بس خلص وكل مارحت ادور عليه يقولوا خلص  . 

* بس هذي هي البرايمرات الي استخدمتها  و ايوه البرايمر مهم كمان خصوصا للبنات الي يستخدموا الفاونديشن بدل 

البيبي كريم لانه يخلي فاصل بين البشره والفاونديشن فا بتالي راح يقلل نسبه تعب البشره من كريم الاساس ^^ .

.

3-البيبي كريم والفاونديشن : في بنات يستخدموا الفاونديشن وفي الي تستخدم البيبي كريم كل وحده وراحتها 

انا بالنسبه لي افضل البيبي كريم مع الجامعه ليييه لانه اخف ع البشره من الفاونديشن يعني ماراح تتعب بشرتك 

مثل ماراح تتعب مع الفاونديشن طيب بس في النهايه براحتك لان انا بكتب بوست عن العنايه الكامله 

فا ان شاء الله راح اتكلم عن العنايه بالوجه  و هيك راح تتفادي مشاكل البشره من الفاونديشن ان شاء الله ^^ .

* طيب بذكر لكم امثله لبيبي كريم أنا استخدمت 2 في حياتي كلها ههههههههههاي 

1# بيبي كريم من غارنيه حلو قوامه ثقيله ششوي بس مو مره يبقع في حاله ماستخدمتي برايمر قبله 

احسس يعطي طبقه لمعه او دهن بسس مو شينه لا بالعكس مره حبيتها فيه يعني مو حيل لا 

ممكن الي مو حابه اللمعه الي فيه تستخدم بودره في كثير ما اعجبهم البيبي كريم هذا 

انا مدري احس حبيته عيييبه الوحيد ان مافي درجات كثير لا بس درجتين مديم ولايت هذي صوره له 

..

2# البيبي كريم الثاني الي هو من ذا بودي شوب الكل يعرفه اتوقع لان كثير صار عليه كلام من البلوقرز 

في كثير ما ناسبهم وفي كثير حبوه انا بالنسبه لي مرررررره عجبني اكثر من غارنيه لانه اخف من غارنيه 

وحسيته انعم ع وجهي من غارنيه ما كأني حاطه ع وجهي شي ابداً فا حاليا استخدمه وبطلت غارنيه هذي صورته 

في منه 3 درجات بسس الاولى فاتحه الثانيه غامقه شوي الثالثه غامقه مره

وفي كمان االلمعه او الدهن  الي في غارنيه بس يشكل اخف لكن حبيتها مرره حسيتها 

تعطي شششكل مررره حلو ومشرق كذا تغطيته اخف من غارنيه اساسا مايغطي ابدا العيوب 

.

# البيبي كريم الي عندها عيوب في البشره اتوقع ماراح تنفع لهم لانها خفيفه ماتخفي العيوب اساسا ما كأنك حاطه 

شيء ع وجهك بسس ممكن تستخدمي كونسيلر معها 

## الفاونديشن عندك فورايفر اعشقه بس ماستخدمه الا في المناسبات الي تغطيته متوسطه هذا هو 

## كمان هلثي مكس برجوا هذا كمان حلو وبطل وكل شي 

..

4- الكونسيلر { خافي العيوب } :

في كثر بنات ممكن يستغنوا عن هذي الخطوه الي هو الكونسيلر وانا منهم ما احب احط كونسيلر في الجامعه 

لكن مافي مانع تستخدمي كونسيلر انتي وراحتك وبشرتك اذا كانت محتاجه حيل الكونسيلر استخدمي 

*** في 3 استخدمتها { من غارنيه , من فور ايفر ,من شانيل } شانيل ماراح اتكلم عنه لانه في حاله تجربه مابحكم عليه 

1# من غارنيه رول اون لايت هذا تغطيته بسسيطه حبيته صراحه خافي وفي نفس الوقت مرطب 

ينفع للجامعه للي عيوبها خفيفه فا هذا راح تنبسط معاهـ له درجتين فقط مديم ولايت ^^

الافضل حطيه وبعدين حطي الفاونديشن او البيبي كريم ^^  وهذا صورته : 

..

2# كونسيلر من فور ايفر في منه علبتين شوفوا صورته : 

انا الي عندي العلبه الاولى اللون الاخضر لتغطيه الحبوب اوبعدين شوفي واحد 

من الدرجات الباقيه الي تناسب بشرتك وحطيه فوق اللون الاخضر 

واذا ما كان عندك حبوب اختاري درجتك وبالاصبع الصغير بالتربييت 

عشان مايطلع معك للون رمادي اذا عندك روج اورنج حطيه قبل الكونسيلر ايا كان 

وبالتربييت وبعدين حطي الكونسيلر وكمان بالتربييت بالاصبع الصغير 

* العلبتين هذي ترى وقت قرأت عنها لها طرق مختلفه في الاستخدام فا ان شاء الله 

أكتب عنها مره حبيته الكونسيلر تبع فور ايفر جميييل صراحه ^^ .

..

5- البودره : مو كل البنات يحتاجوا البودره اذا حسيتي بدهون بلمعه زايده حطي بودره اما غيره ما احس 

انه تحتاجي بودره بس بودرات تجيك 3 في واحد كونسيلر وفاونديشن وبودره مع بعض مثل عندك بودره 

ذا بودي شوب عندهم هذي البودره بس من زمان فا ناسيه اسمها كانت حلوه تفي بالغرض 

بسس ماحسيت انها بيرفكت .

في عندك بودره ديور المضغوطه علبتها كحلي حلوه وتفي بالغرض جميله من جد 

في بودره ماكس فاكتور ماعرف اسمها بس هي الي حاليا استخدمها حلوه ماشي حالها بس ديور احلى منها 

..

6- الشادو { الظل } : هنا البدع هههههههههههههههاي انا ما استخدم شادو صراحه بس عادي تحطي 

بس اختاري الوان هاديه مرررررره مثلا عندك اللون البيج مع البني او الوردي الفاتح يعني كذا الوان رايقه 

وتعطي شكل طبيعي وسمبل مررره ^^ 

في اكثر من باليت شادو في راسي لكن بعطيكم ابسط مثال الباليت الي كان من مشترياتي من سيفورا هذا هو 

الالوان الي ع اليسار رايقه وتنفع للجامعه لكن مو شرط تروحي تاخذي من سيفورا في عندك ماك او باليت نيكيد1

في عندهم الوان رايقه وتنفع للجامعه ... 

..

7-الحواجب , هذا اهم شيء عند اغلب البنات للامانه انا استخدم حاجتيني من بودي شوب البودره والقلم 

ومرره عاجبيني وهذي صورهم :

..

8- الماسكرا : الماسكرا عشششقي من جد هي الي تحلي العيون عندكم ماسكرات كثير 

*في ماسكرات ميبلين اكثر من وحده جربتها وعجبتني مررره وحده منهم إسمها Falsies Black Drama 

ما تكتل احسها رايقه لوقت الدوام يعني معقوله ما احسها تكثف وتطول مرره لا بشكل طبيعي وهذي صورتها :

.

**كمان في ماسكرا من لانكوم اسمها hypnos drama حلوه ماتكتل بس احس ميبلين انسب للجامعه ^^

وهذي صورتها بس انها حلوه هذي الماسكرا 

..

9- الكحل : حلو الكحل ويكمل الطله هههههههه ممكن تستخدمي الوان مختلفه من الكحل عندك الازرق الاخضر البني 

الاسود والبيج والابيض بسسس انا افضل الاسود والبني عن غيرها احس هي الي تناسب الجامعه وبتعطيك شكل 

طبيعي اكثر عندك البيج والابيض تكبر لك العين لكن البيج بيعطي شكل طبيعي اكثر من الابيض ^^ 

كمان حلو الابيض والبيج للجامعه ^^. 

الماركات كثير للكحل انا احب فورايفر و جفنشي هي جربتها وكانت جميييله معاي ^^" 

..

10- الاي لاينر الرسم السائل : هذا في كثير مايحبوه مع الصباح بس تقدري ترسمي بس خط رفيع من فوق الرموش 

في منه الجل وفي منه الي مثل القلم وفي اللكويد منها لو كنتي مبتدئه خذي القلم تقدري تتحكمي في اكثر 

عندك ماركه برجوا نزلت قلم مرره عجبني وجربته فضضيع وهذا صورته :

..

اذا كنتي تبغين جل اي لاينر عندك حق بوبي براون و ماك بي بوبي براون احلى > كرهت ماك هههههههاي 

11-البلاشر : اعشق البلاشر واحس لو تحطيه بدون فاونديشن وبيبي كريم بيطلعك بشكل كمان هههههههه 

البلاشر الكل يعشق بلاشرات ماك بس انها غاليه صراحه اذا تبون البديل عندكم نيكس و ايلف حلوه بلاشراتهم 

اللون لا اشوف وحده حاطه احمر هاه ههههههه 

اختاري  اللون الخوخي المشمشي الوردي الفاتح يعني بعدي عن الغوامق مع الصباح 

شوفي هذي اللوان للبلشرات هذي العلبه من عند انجلوت بس اكيد راح تلقي نفس الالوان عن ماركات ثانيه

12- الارواج والقلوس : اول شي للشفايف استخدمي واقي شمس لها وبعدين حطي الروج 

الالوان سواء قلوسات او ارواج كمان بعدي عن الالوان الغامقه اختاري الوان فاتحه

مثل الخوخي او الوردي او اللحمي الماركات الي جربتها في الارواج وحبيتها ارواج انجلوت استخدمت واحد

مرره عجبني وكتبت عنه في الانستقرام وريفلون كمان ارواجهم حلوووه 

اما ماك صراحه استخدمت واحد من عندهم كرهني في ماك كله مدري ليه بس اكيد راح اكتب عنه  . 

شوفي هذي من ريفلون حتى الوانها رايقه حبيتها  . 

..

*

*

*

طيب كذا استعرضت خطوات الميك اب و الماركات الي افضلها لكن هذا مو يعني تروحي تشتري 

نفسسس الماركات الي حطيتها والي مدحتها لا ممكن انتي في ماركات حابتها ومرتاحه فيها 

بس انتي اخذي الخطوات والالوان ومن هذا الحكي نجي لطريقة وضع الميك اب قلت بدل الكلام 

بحط لكم فيديوز وانتم عليك التجربه لان في النهايه تجربي اكثر من طريقه وتشوفي الي ناسبك 

آوكي هذي بعض مقاطع الفديو حبيت الميك اب فيها بسيطه وناعمه ^^ .

وطوا الصوت حبيباتي ^^

..

1

لاحظوا كيف طبطبت باصبعها الصغير بالكونسيلر  مرره رايق الميك اب هذا ^^ 

..

2

هنا مرره حبيت الميك اب وهذا الفديو الي ابغى اشرحه لكم و مو قادره بس كويس لقيته هههههههههههههه

مرره ناعم ماتغير في شكلها طبيعي مرره مرره مررره ^^

..

3

هذي مررره ميك ابها سنبل وهو الي احبه شخصيا مرره طلع شكلها طبيعي مافي ولا شيء اوفر من جد دوام صباح^^

.

.

.

كذا اكون خلصت البوسسست إن شاء الله ما اكون نسيت حاجه 

إن شاء الله اكون وفيت وكفيت فيه ههههههههه 

ايوه ناويه اسوي تدوينات عن طالبات المدرسه ان شاء الله بس ياليت يساعدوني 

في المواضيع انا جبت موضوع واحد وارح اتكلم فيه ان شاء الله بس 

إذا انتوا حابين شيء معين قولوا لي بكون من جد مبسوطه بخدمتكم ^^ 

اي سؤال عن البوست ولاغيره اي اقتراح اي رأي تفضلوا ما يردكم شيء 

كل حساباتي في الاسك وتويتر والانستقرام و بينترست موجوده ع يمين المدونه 

او تواصلوا معاي من الايميل تلقونه في ايقونه Contact me اعلى المدونه 

ويسعدكم ربي جميعا ^^