استعداد لمناسبه 1 : { شاور قبل مناسبتك - مقشر القهوه }

السلام عليكم ورحمة الله وبركاته

كيف حالكم بنات ؟ إن شاء الله الجميع بخير

واجازه سعيده عليكم يارب ^^

بما ان الفتره الجايه الاغلب راح تكون مناسبات مختلفه سواء حفلات تخرج او زواجات وغيره من الحفلات

فا حبيت اسوي لكم بوست عن الاستعداد لمناسبه ..

راح اتكلم عن تجربتي انا والحاجات الي اسويها انا قبل المناسبه بيوم  او ممكن في نفس اليوم

لكن الافضل انك تتجهزي قبلها ب اسبوع او اكثر ..

ما ارح اتكلم عن لبسك كيف راح يكون او ايش تلبسي ومن هذا الكلام لان ما راح يمدي

فا طبيعي تكوني انتي مجهزه من فتره ايش راح تلبسي خصوصا لو كانت المناسبه مهمه

فا اكير سويتي فستانك سواء طلبتيه اون لاين او فصلتي او اشتريتي جاهز يعني من ناحيه

الملابس احس ان الكل جهز ايش بيلبس ومن هذا الكلام ... ^^

..

الي راح اتكلم عنه في هذا البوست هو الشاور الي قبل المناسبه بيوم او الي بنفس يوم المناسبه ^^

اي وحده عندها مناسبه تقدر تستفيد من هذا البوست إن شاء الله يعجبكم ^^

..

نبدأ بالجسم

فالبدايه لازم تتخلصي من الشعر الزايد الي في جسمك  قبل المناسبه بفتره بأي طريقه انتي حابتها

سواء بالحلاوه او الفيت او الاله نظفي جسمك تماما من الشعر خصوصا لو بتلبسي قصير ووكذا ..

بس ضروري قبل المناسبه بفتره عشان جسمك مايكون محمر و متحسس  منها وكذا ^^

..

* طيب نبدأ بالشاور

ابغاك تجهزي هذي الاغراض :

1- ليمون يا تعصريه او تخليه بالحبه بدون ماتعصريه ^^

2- المقشر وهو عباره عن :

قهوه تركيه او فرنسيه { انا افضل التركيه } , سكر يكون خشن مو ناعم , ملح , زيت زيتون

تخلطي هذي الاغراض مع بعض بحيث تكون جامده مو سايله يعني تتكون عندك مثل المقشرات

الي تجيبها من برا ..

3- فازلين جل بالكاكاو او كريم {ليبو بيز }

4- زيت جونسن للاطفال او الجل الزيتي من جونسون اختاري النكهه الي انتي حابتها ..

5-شاور جل يكون بروائح شوفي الافضل عندك انا استخدم واحد من الاربعه الي في الصوره

اثنين من باث اند بودي وركس , اثنين من بودي لوجي الكبيره .. ^^

6- تولات اختاري الروائح الي حابتها عندكم اجمل و زهور الريف عندهم روائح جميله واسعارها حلوه وتثبت ريحتها ^^

7- لوشن مرطب سواء برائحه ولا بدون افضل بدون رائحه لان بتستخدمي تولات ^^

انا استخدم لوشن فازلين بازبده الكاكاو ترطيبه جميل ^^

8- مزيل العرق الخاص فيك انا استخدم حق بيزلين او هنا مزيل عرق في البيت تسويه تكلمت عنه قبل كذا :

http://diamond9950.blogspot.com/2013/09/deodorant.html

طبعا الافضل ماتجربي هذا الوقت مزيلات عرق الا الي متعوده عليها انتي وضامنتها ^^

## ملاحظه : ملاحظين ما طلبت صابونه وليفه ومدري وشو لان انا ايام المناسبات ما استخدم

لا صابون ولا ليفه اكتفي بس ب المقشر الي كتبته لكم فوق ^

فا الافضل تكوني قبل الشاور هذا تكوني اساسا متروشه ب صابوناتك المفضله وليفتك ^^

.

طيب نبدأ خطوه خطوه :

1-آول حاجه بللي جسمك مو كثير شوي بس وبعدين جيبي الليمون يا تدعكي بنفس الحبه الليمون او

اعصريها في صحن ودعكي جسمك فيها لحد تتشرب البشره عصير الليمون ^^

.

.

2- جيبي المقشر الي سويتيه مره حلوه يابنات المقشر هذا وانا استخدمه في الاسبوع مرتين

حبيب قلبي المقشر هذا ماراح تحسون فيه الا لما تجربوه انا اعطيتي هو امي ومن بعدها وانا مدمنه عليه

دعكي جسمك فيه مزبوووط يعني لمده ربع ساعه لحد ماتحسي ان السكر بدأ يذوب راح تتعبي

بس مره جميله نتيجته ويرطب بشكل فضيع يعني بعد الشاور محتاجه لوشن خفيف للترطيب ^^

ملاحظه : المقشر في ملح لو كنتي مو مطوله وانتي شايله الشعر من جسمك  ممكن يسبب لك حساسيه ^^

3- غسلي جسمك من المقشر بمويه فاتره لا حاره ولا بارده مايله للبروده اكثر ^^

..

..

4- وبعدين استخدمي الشاور جل اي رائحه تفضلينها بس عشان تبعدي ريحه القهوه و زيت الزيتون عنك ^^

انا استخدم هنا من باث اند بودي وركس و من عندك بودي لوجي كلها روائحها طيبه وثابتها مؤقت

..

..

5- كذا خلصنا شور جففي جسمك من المويه استخدمي زيت الاطفال او الجل الزيتي كا ترطيب لكل الجسم

والفازلين الجل او كريم ليبو بيز  للاكواع و الركب والاماكن الي جفافها قوي في جسمك ممكن القدم لان ترطيبها

قوي وثقيل ع الجسم ^^

6- بالنسبه للـ  لوشن مثل فازلين بالكاكاو تقدري تستغني عنه بس الافضل تحطيه خصوصا لو تروشتي

قبل المناسبه بيوم لكن لو بنفس يوم المناسبه تروشتي تقدري تستغني عن اللوشن وانتي وبشرتك

اذا بشرتك محتاجه ترطيب كثير استعملي لوشن بس المقشر الي استخدمتيه راح يعطيك ترطيب جميل ^^

..

..

7- استخدمي مزيل العرق الخاص فيك وضروري ماتلبسي ملابسك والمزيل باقي ماجف لحد تتشربه البشره

بعدين البس ملابسك

8- نجي للتولات العطريه زي ماقلت انا استخدم تولات من زهور الريف في عندهم روائح قويه تصلح

للسهرات احط شوي في يدي وبعدين اوزعه على جسمي زيت الاطفال راح يثبت لك ريحه التوله

وراح تبقى الريحه فيك لمده يومين او اكثر كمان ^^

..

كذا خلصت البوست / البوست الجاي راح يكون عن شعرك عشان يسهل 

عليك الاستشوار ^^ 

إن شاء الله تستفيدوا من السلسله البسيطه ^^

يسعدكم ربي :)

..