العودة للمدرسة / استعداد المعنوي و النفسي , نصائح من قلبي لكم Back to school:Words from my heart

السلام عليكم ورحمة الله وبركاته

يسعد ايامكم حبايبي ..

كيف حالكم ؟ إن شاء الله كلكم بخير

السنه الي فاتت ما سويت سلسله العودة للمدرسه سويت بس للجامعه

واحس كثير من متابعاتي باقي يدرسوا في المدرسه قررت اسوي لهم هذي السلسله ..

حبيت ابدأ اول شي بـ إستعداد النفسي والمعنوي للمدرسه

كيف تستعدي نفسيا و معنويا وجسديا للدراسه ؟!

..

.
في البدايه لازم تحطي في بالك نقطه مهمه انه انتي بتروحي المدرسه بتروحي
ودايم حطي في بالك انك ما تروحي بس للعب وتشوفي صاحباتك انتي تروحيها من الاساس
لهدف واحد الي هو هدف انك تتعلمي قبل كل شي لو ما الهدف هذا كان ما روحتي المدرسه اساسا
                                           ..

.

بنات لا تخلوا كل شي في حياتكم وناسه وتخلي من نفسك تافهه ماعندك لا مبدأ ولا قناعات ..

لاتقولي صاحبتي دايم حاولي يكونوا صاحباتك معقولين من ناحيه الشغب و من ناحيه الدراسه

خلي دايم عندك مبدأ كل شي له وقته للدراسه وقتها لسواليف وقتها للعب وقته للاكل وقته

لا تخلين نفسك عشوائيه بالعكس وقت تكوني منظمه كذا ممتع لك اكثر يوم يكون وقتك كله

للعب واكل وسواليف ولا اقول لك خلي كل وقتك عينك بالكتاب *.*
بس مو تمشي مع مثل { مع الخيل يا شقراء } ههههههههه 
انتي عندك شخصيتك لو شايفه هذا الشي غلط 
يعني غلط مو تسوينه عشان ماتقولي لهم ( لا مابغى ) 

..

.
خلوني اكلمكم عن ايامي كانوا في بنات يعني مدري كيف اوصفهم بس شغب بزياده توصل فيهم
لـ إزعاج الي حولهم و الاهانه لهم هذا الشي كااااان يرفع لي ضغطي مرره
يعني ما احب ابدا الاستهزاء سواء ب طالبه او ب معلمه انا ما اعرف كيف قلوبهم تطاوعهم صراحه
هذا غير حركات { تتحدوني اسوي كذا } مو على حساب الغير
يعني كان في استهزاء بالمعلمات لدرجة بعض المعلمات يخرجوا من الحصص يبكون بسبب حركات بعض البنات :(
حطي في بالك دايم كما تدين تدان ..
لا تفكري اي حركه سويتيها في معلمه او في طالبه جرحت مشاعرهم احرجتهم ممكن بكرا تدور الدنيا وترجع لك ..
خلي دايم ذكرك طيب بين الي تعرفتي عليهم هذا الشي ماراح ينقص  منك بالعكس يزيد منك :)

..

.

صدقوني اذا كنتي محترمه راح تلاحظي حتى المعلمه العصبيه و الي موش ولابد تحترمك ولا تقدر تتجرأ عليك ^^

دايم خليك فله بحدود مو فله ع حساب الغير احترمي كل صاحبه معك في الفصل

احترمي المعلمه الي تشرح لك ابدا مو شطاره وقت تقلي ادبك عليها او تسوي فيها حركات تحرجها

أبدا مو شطاره ولا انتي الفله والمدري وشو اتذكر ع ايامي البنات الي يطولوا السنتهم ع المعلمات هذولي

مرره شاطرات ايوه شخصيتهم قويه لا ابدا والله كنت انظر لهم نظره
{ الحمد الله والشكر*.* } جد والله ^^

..

.
راح اكلمكم عن الاستعداد للدراسه :
انسي الاجازة و الوناسه شبعنا نوم وشبعنا لعب وشبعنا وناسه وسوينا الي بخاطرنا
الي سافروا سافروا والي ما سافروا اكيد ماخلوا شي بخاطرهم وقت الاجازة حتى لو مارحتي ولا جيتي ^^
فا جاء وقت الي تستعدي للمرحله الجايه لك سواء كنتي متوسط او ثانوي
انتي من دخلتي اولى متوسط تبدأ مرحلة رسم لمستقبلك وش تبغين تكونين وش حلمك وش هدفك من الدراسه
لازم ترتبيهم في جدول عشان تعرفي انتي ايش تبغين !!
حددي ايش تبغين تدخلي في الجامعه تخصص ايش ؟!
ابحثي عنه شوفي شروط القبول فيه واشتغلي ع نفسك
لا تخلي يجي ثالث ثانوي وتجي الجامعه وانتي مو عارفه اش تدخلين < مثل حالتي ^^
على ان انا كنت ابغى اداره اعمال و انقبلت فيها بس بحركه غيرت و دخلت كليه العلوم ^^
بس كنت ضايعه صراحه ما كنت اعرف انا ايش ابغى بالزبط مره اقول كذا ومره اقول ذا وهذا بس كلام اقوله 
 طبعا هذا الشيء جاب لي احباط لان في عقلي 
مستحيل ما أخذ شهادة بكالوريوس ع الاقل يعني بس حاليا بدأت افكر و احدد اهداف يعني ما ضاع الامل ان شاء الله 
بس ابدا كنت خطأ والعبط الي براسي كنت اقتنع بالنصايح اهلي بس ما اسويها هذا الشي كنت مررره غلطانه فيه 
هذا اثر علي وعلى مستواي حتى في اول سنة لي بالجامعه على ان صراحه كان مستواي في المدرسه حلو ومقتنعه فيه 
بس سبحان الي غير الاحوال والحين انا تعبانه في ان ازيد معدلي عشان كذا اقول حددي قدراتك واهدافك 
عشان تعرفي التخصص الي انتي عارفه انك بتكوني ممميزه فيه مو بس شاطره ابغاكم مميزات ومبدعات 
لان احب اشوف بنات بلدي مميزات مبدعات وشطورات و كذا يعني ^^ 
اذا كنتي مو عارفه انتي اش حابه او انتي ايش ميولك حاولي تبحثي في التخصصات
وتشوفي اكثر شي مايله له لو حتى تجربي تميلي لقسم معين وتشوفي هل انتي حابه معلوماته
قادره انك تستوعبيها وتبدعي فيها وهكذا ....

..

.
وقتك وطريقة استغلالك له هو الشي الي بيخليك ناجحه

لا تجي الاختبارات وانتي ماتدري الكتاب اش فيه

حاولي اول بأول تخلصي امورك اسهل لك عشان لا تراكم عليك اخر الترم و تتورطين و تتعبين نفسك

الواجبات قدميها وحليها لا تسحبي عليها خصوصا واجبات المواد العلميه لانها تساعدك على انك تستوعبي

الدرس الي اخذتيه اي شي مو فاهمته حاولي اول بأول تدوري احد يشرح لك والنت ما خلى شي اي

سؤال راح تحصلينه في النت اذا في معلمات يطلبوا انشطه وملفات يعني ع حسب نظامكم في المدرسه كيف

ذحين في نظام المقررات مثل نظام الجامعه اهم شي في كل الحالات لا تهملي وفي النهايه تتعبي نفسك :)

قسمي وقتك في البيت بين النوم والراحه والاكل والدراسه

وراح تحسي براحه نفسيه والله لا متذمره من الدراسه ولا طايحه وشايله هم بس
 وانتي ماسويتي شيعشان الهم هذا يزول  وتحسي مريحه ضميرك ومشتريه راحة بالك .. ^^

حتى لو عندك هوايه محدده بتنظيمك لوقتك تعرفي كيف تمارسيها يعني ما راح تحسي 

أنك ممشغوله عنها و ماعندك الوقت لها وبكذا نفسيتك ب تتعب ^^ 
ملاحظة ( سلكوا لرسمة الساعه *.* )

..

.
مافي حاجة صعبه كل حاجه وصلت له الناس انتي قادره توصلينه > جملة أمي الشهيره عندنا هههههههه 
جد والله بما ان الناس عرفوا وتعلموا اذا مافي شي صعب بالنسبه لي 
أحس الاجتهاد هو الي يحدد اذا الي حولك يحكموا عليك اذا انتي غبيه او ذكيه 
يعني بالنسبه لي مافي احد ذكي ولا غبي انتي الي تحددي  نفسك ذكيه او غبيه ^^ 
كنت مره اشيل هم الرياضيات على ان تخصصي علمي بس كان عندي كره لمادة الرياضيات والفيزياء 
بس انا صراحه الي خليتها صعبه بس وقت احط راسي عليها وادور اكثر من طريقه لشرحها 
صار الموضوع بالنسبه لي سسسهل جدا وان كانت للحين معقدتني هذي المادتين الا انه 
لو صار وجاتني راح اعرف لها يا انا يا هي هههههه ^^ 
عشان تنجحي و تمشي في موادك لازم تشيلي من بالك كلمة صعب .. :) 

...

.

دايم هذا الشيء في بالي ربي مايضيع تعب احد 

انتي بذلتي تعبتي راح تلقي نتيجة تعبك ربي ماراح يظلمك لو يظلموك العالم كله 

دايم خلي هذا الشي في بالك وكلي امرك لربي في كل خطوة تخطينها في حياتك 

في الاختبار ذاكرتي تعبتي جسديا بقلبك وجوراحك كلها املك بربي
حطي في قلبك وعقلك 

لو ذاكرتي و تعبتي وربي ما كتب لك تحلين ماراح تحلين لو ايش يصير 

هذي النقطة من قلب اقولها لان انا جربتها والله يابنات اول سنة بالجامعه مره تعب مره ارهاق 

وعلى ذالك مو محصله نتيجة مرضيه من 2 سنة بالجامعه كان ابوي وامي يقولوا وكلي امرك لربي 

والله اوقات اطلع من الاختبار مخربطه الحل كله ضايعه ولا ادري انا حليت انا ماحليت الي اعرفه ان اسمي صح هههههه

بس اجي عند النتيجة جدا تفرح القلب مرره تفرح احيان اقول معقول انا جايبه كذا بس هذا من قلبي بفضل ربي 

مو بسبب مذاكرتي ولا بسبب ذكائي ولا بسبب الدكتوره راعتني كله بفضل ربي هو الي كتب لي النتيجة الحلوه هذي :) 

..

.
أشكري ربي ع كل نتيجة تحصلينها اشكريه اشكريه اشكريه على اي شي يصير لك 
اي شي ربي كاتبه لك هو الصح هو الخير لك صدقوني 
كان ع بالي ايام التقديم بالجامعه كليات معينه كان ودي ادخلها وزعلت وقتها عشان مادخلتها 
بس حاليا جالسه احمد ربي الف مره اني مادخلتها جد والله جدا ايجابيات في حياتي شايفتها 
بسبب اني مادخلت هذي الكليات الي زعلت وبكيت عليها 
تعلمت كثير عرفت حاجات كثير تفكيري قناعاتي تغيرت للافضل , 
من قلبي عارفه  لو دخلت الكليات هذيك كان ماتعلمت الي تعلمته الحين كان ماتغيرت وغيرت تفكيري كمان :) 

.

.

.

.

.

.
.
.

بس كذا ان شاء الله اني مانسيت حاجه واسفه اذا كلامي مخربط 

بس حبيت ابدأ سلسله العودة للمدرسه ب بوست معنوي عشان يطيركم من جو الاجازة ^^ 
ويارب تكون سنه جميله وسعيده بعيده عن الاحزان و الدموع 
و الدرجات المعفنه ههههههههه 
يارب =) 

البوست الجاي ان شاء الله راح يكون
ثاني بوست في السلسله ان شاء الله ينزل قريب 
ما حددت ايش انزل اول بس وقتها تشوفوا ^^ 
يسعدكم المولى ^^